ایران مجلیسی اوخوللاردا ائتنیکلرین اؤز دیللرینده ائیتیم الماسی لاییحه‌‌سینه قارشی چیخیب
۸ اسفند ۱۴۰۳-جو ایلده مجلیسین آچیق اوتوروموندا "اوخوللاردا ائتنیک دیللرین ائیتیمی" لاییحه‌‌سی موذاکیره‌یه چیخاریلدی. لاییحه ایسه سس‌وئرمه‌ده ۱۳۰ قارشی سس، ۱۰۴ قبول سس و ۵ طرفسیز سسله رد ائدیلدی.
ایراندا آنا دیلی و ائیتیم مسئله‌‌سی اوزون ایللردیر موذاکیره مؤوضوسودور. حوقوق ساوونوجولاری آنا دیلینده ائیتیمین قاداغان اولونماسینی اوشاقلارین ائیتیمدن گئری قالماسی‌نین و یا ضعیف نتیجه‌لر گؤسترمه‌سی‌نین اساس سببلریندن بیری کیمی گؤرورلر. چونکی فارس دیلیندن باشقا بیر دیلده دانیشان اوشاقلار اوخولا قدم قویدوقلاری ایلک گوندن باشقا بیر دیلده ائیتیم آلماغا مجبور اولورلار. بو ایسه اونلارین آکادئمیک گؤستریجیلری‌نین آشاغی دوشمه‌سینه سبب اولور.
بونونلا یاناشی، آنا دیلینده ائیتیم حوقوقی و وطنداش حوقوقلاری چرچیوه‌سینده اولوسلارآراسی سويه‌‌ده تانینان بیر حاقدیر و بیر چوخ اؤلکه‌لر بو حوقوقا حؤرمتله یاناشیر.
بونا باخمایاراق، ایران مجلیسی یئنیدن بو وطنداش حوقوقونون قارشیسیندا دایاندی و تقدیم اولونان قانون لاییحه‌‌سینی قبول ائتمه‌دی.
اؤتن هفته دونیادا اولوسلارآراسی آنا دیلی گونو قئید اولونسا دا، ایراندا بونون عکسینه اولاراق فعاللارین حبس اولونماسی ایله یاددا قالدی. یالنیز بیر نومونه اولاراق، ۴ اسفند ۱۴۰۳-جو ایلده ماراغادا مدنی فعال محمد اسدی اوخوللاردا تورک دیلینده ناغیل کیتابلاری پایلادیغی اوچون ایرانین اطلاعات ناظرلیگی طرفیندن حبس ائدیلدی.
قئید ائدک کی، ایران ایسلام جمهوریتی آنایاساسی‌نین ۱۵-جی ماده‌‌سینه اساساً، رسمی دیل فارس دیلی اولسا دا، باشقا ائتنیک قروپلارین و ملتلرین ادبياتی‌نین اوخوللاردا ائیتیمی سربست اولمالیدیر. لاکین بونا باخمایاراق، بو قانون ایجرا ائدیلمیر و آنا دیلینده ائیتیمه قارشی موختلیف مانعه‌لر یارادیلیر.
