تورک مدنی فعال علیرضا فرشی ۲۹ مرداد ۱۴۰۴-ده مرند محکمه‌‌سینه موراجعت ائتدیکدن سونرا، پولیس امکداشلاری طرفیندن ۸ آیلیق محکوملوق مدتینی چکمک اوچون مرند مرکزی حبس‌خاناسینا کؤچورولوب.
"عباس لسانی‌نین تلگرام صفحه‌‌‌سی"نین وئردیگی خبره گؤره، فرشی‌نین ۸ آیلیق حبس حؤکمو تهران اینقیلاب محکمه‌‌سی‌نین ۲۳-جو شؤبه‌سی طرفیندن چیخاریلیب و تهران تئمییز محکمه‌‌سی‌نین ۳۶-جی شؤبه‌سی اونون وکیللری اصغر محمدی و وحید امیریانین و یا اؤزونون ایشتیراکی اولمادان عینیله تصدیقله‌ییب.
فرشی دفعه‌‌لرله تهران ایالتی‌نین بهاریستان ساوجیلیغیندا کئچیریلن محکمه سورجینه اعتراض ائدیب. او، اؤز "اینستاگرام" صفحه‌‌‌سینده یازمیشدی: “بیر ایلدیر اعتراض ائدیرم کی، من دوغو آذربایجان ایالتی‌نین مرند شهرینده یاشاییرام آنجاق منی یاشاییش یئریمدن ۷۰۰ کیلومتردن آرتیق اوزاقلیقدا اولان بیر شهرده موحاکیمه ائدیرلر!”
علیرضا فرشی دیزج یئکانلی ۴ ایللیک حبس جزاسی‌نین ۳ ایل ۳ آیینی چکدیکدن سونرا اوین حبس‌خاناسیندان آزادلیغا بوراخیلمیشدی.
آیریجا، بو آذربایجانلی مدنی فعال ۱۳ خرداد ۱۴۰۲-ده اینستاگرام" صفحه‌‌‌سینده پایلاشدیغی بیر یازیدا، ۲ ایل مدتینه مجبوری سورگون حؤکمونه تابع اولمایاجاغینی و خوزیستان ایالتی‌نین باغملک شهرینه قاییتمایاجاغینی اعلان ائتمیشدی.
علیرضا فرشی آنا دیلینده ائیتیمی طلب ائدن فعاللاردان بیریدیر. شریف بیلیم‌یوردوندا بیلگی‌سایار موهندیسلیگی اوزره یوکسک‌لیسانس درجه‌‌‌سی آلیب، سراج بیلیم‌یوردونون قووولموش استادی‌دیر و جولفا اولوسلاراراسی بیلیم‌یوردونون کئچمیش اؤیرتیم عضوودور و ایران - عراق ساواشیندا آتاسی شهید اولموشدور.
جناب فرشی، آذربایجانین محروم کندلرینده آذربایجان تورکجه‌سینده کیتاب‌خانالارین یارادیلماسی و آنا دیلینده تدریس اوچون دستک کامپانییالاری‌نین قورولماسی دا داخیل اولماقلا، بو مدنی فعالیتلرینه گؤره بیر نئچه دفعه توتولموشدور.
