بازار گونو، ۲۶ اسفند آییندا، داها اؤنجه قتل اتهامی ایله آیری آیری پرونده‌لر چرچیوه‌سینده اعدام جزاسینا محکوم ائدیلمیش دؤرد محبوس، او جومله‌‌‌دن ایکی قادین، اورمیه حبس‌خاناسیندا اعدام ائدیلدی.
هرا طرفیندن کیملیگی تصدیقلنمیش محبوسلار آشاغیداکیلاردیر: ارشد فرزادبند، حامد فرجی و ائشی مژگان آذر پیشه و کوثر باقر نژاد.
هرانانین الده ائتدیگی بیلگیلره گؤره، کوثر باقرنژاد ۱۴۰۰-جو ایلده داییسی اوغلو اولان اؤز حیات یولداشینی اؤلدورمک اتهامی ایله حبس اولونوب و سوندا جینایت محکمه‌‌سی طرفیندن اعدام جزاسینا محکوم ائدیلیب. ارشد فرزادبند و حامد فرجی ده قتل اتهامی ایله حبس اولونموش و جینایت محکمه‌‌سی طرفیندن اعداما محکوم ائدیلمیشدی.
مژگان آذرپیشه و اونون حیات یولداشی حامد فرجی ایسه ۱۳۹۸-جی ایلین آذر آییندا بیر عراق وطنداشی‌نین قتلی ایله باغلی حبس اولونموش و اعداما محکوم ائدیلمیشدیلر.
بو محبوسلار اعدام حؤکمونون ایجراسی اوچون تک‌آداملیق هوجره‌یه کؤچورولموشدولر.
بو واختا قدر حبس‌خانا یئتکیلیلری بو اعداملاری رسمی اولاراق آچیقلاماییبلار.
اؤتن هفته‌لرده ایران‌دا اعدام حؤکملری‌نین ایجراسی‌نین آرتماسی و سیاسی محبوسلار اوچون اعدام حؤکملری‌نین وئریلمه‌سی اؤلکه ایچینده و دیشیندا چوخ‌سایلی اعتراضلارا سبب اولوب.
هرانا داها اؤنجه اولوسلارآراسی اعدام جزاسینا قارشی موباریزه گونو موناسیبتیله حاضرلادیغی راپوروندا ایران‌دا ۱۰ اکتبر ۲۰۲۳-جو ایلدن ۸ اکتبر ۲۰۲۴-جو ایل تاریخلری آراسیندا ان آزی ۸۱۱ نفرین اعدام ائدیلدیگینی یازیب.
