ایران وایرین خبری اساس دا، اورمیه‌ده یاشایان مدنی فعال، “قادین، حیات، آزادلیق” آکسییالاری ایله باغلی ساخلانیلانلاردان بیری اولان “اشکان سعادت مهر” توپلام ۷ ایل حبسه محکوم ائدیلیب.
ایران‌وایره چاتان خبره گؤره، اورمیه‌نین شهری‌نین ۲-جی جینایت محکمه‌‌سی‌نین ۱۰۸-جی شؤبه‌سی‌نین باشقانی محمدرضا غنی‌زاده اشکان سعادت مهری “موقدسلری تحقیر ائتمک” اتهامی ایله ۵ ایل و "سانال اورتامدا یالان یایماق" اتهامی ایله ایکی ایل حبس جزاسینا محکوم ائدیلیب.
یاییملانان دادنامه‌یه اساساً، اشکان سعادت مهر باره‌سینده حؤکمون چیخاریلماسی اوچون باتی آذربایجان اطلاعات ایداره‌سی‌نین راپورو اساس توتولوب. بو مدنی فعالین محکمه‌‌ده ایشتیراک ائتمه‌مه‌سی و ساوونماسینی تقدیم ائتمه‌مه‌سی سببیندن بو حؤکم قیابی وئریلیب. بو پرونده‌نین باشقا بیر حیصه‌‌‌سینده اشکان سعادت مهر اورمیه اینقیلاب محکمه‌‌سی‌نین ۲-جی شؤبه‌سینده “رژیمه قارشی تبلیغات” اتهامی ایله موحاکیمه اولوناجاق.
اشکان سعادت مهر اورمیه‌ده یاشایان مدنی فعالدیر. او، ۲۹ شهریور ۱۴۰۲-ده آذربایجانلی مدنی فعاللارین حبسلری‌نین یئنی مرحله‌‌‌سی ایله عینی واختدا حبس ائدیلمیش و بیر آیا یاخین حبسده قالدیقدان سونرا ۲۳ مهرده گیروو قارشیلیغیندا سربست بوراخیلمیشدیر. بو ایل آذر آیی‌نین ۵-ده جناب سعادت مهرین اینستاگرام صفحه‌‌‌سی دایاندیریلیب و بو صفحه‌‌‌ده‌کی بوتون یازیلار سیلیندی و بو مضمونلا بیر یازی یاییملاندی: بو صفحه جینایت و آنتی-گوونلیک فعالیتینه گؤره محکمه قراری آلیناراق باغلانیب و اونو یارادانلارا قارشیلیق وئریله‌جک.”.
جناب سعادت مهر “قادین، حیات، آزادلیق” آکسییالاری ایله باغلی ساخلانیلانلاردان بیریدیر. کئچن ایل گوونلیک گوجلری اونو اؤز ائوینده اوشاقلاری‌نین گؤزو قارشیسیندا حبس ائتمیشدی. بو مدنی فعالین اوغلو بو حادثه‌‌‌دن سونرا و گوونلیک گوجلری‌نین ائوه قانونسوز داخیل اولماسی و آتاسی‌نین زورلا حبس ائدیلمه‌سی‌نین یاراتدیغی ایسترئسسدن ککله‌ییب. بو اوشاغین هله ده آلدیغی روحی تضییقلر هله‌ده داوام ائدیر.
