ایران وایرین خبری اساسدا، بو ایل ۲۲ مرداد گونو حبس ائدیلن ۶ بهایی وطنداشیندان بئشی هله ده اوین حبس‌خاناسی‌نین ۲۰۹-جو بندینده بلیرسیز دورومدا ساخلانیلیر.
بو ایل ۲۲ مرداد گونو اطلاعات ناظرلیگی داواخانا صاحبی اولان بهایی وطنداشلارین حبسی و اونلارین چرکلی پوللارین یویولماسی و نارکوتیک قاچاق‌مالچیلیغی ایله علاقه‌‌‌سی باره‌ده بیلگی یاییب.
ایران‌وایرین الده ائتدیگی بیلگیلره گؤره، سینا ایقانیان، افشین طبیانیان، اشکان طبیانیان، اردلان طبیانیان، افسانه طبیانیان و فریبرز خانجانی، توپلام ۱۷ داواخانانی یؤنتن آلتی بهایی وطنداشدیر کی حبس ائدیلیبلر و یوخاریدا قئید اولونان اتهاملاری رد ائدیبلر.
بو شخصلره یاخین قایناقلار ایران‌وایره بیلدیریبلر کی، بو شخصلرین حبسی ایله باغلی گئنیش تبلیغاتا باخمایاراق، اطلاعات ناظرلیگی بو وطنداشلارا قارشی ایره‌لی سوردویو ادعالارا دایر هئچ بیر ثبوت تقدیم ائتمه‌ییب.
حاضردا بیر-بیری ایله قوهوم اولان و ساخلانیلان وطنداشلارین داواخانالاری مؤهورله‌نیب.
بو شخصلره یاخین قایناقلاردان وئریلن بیلگیلره گؤره، داواخانالارین مؤهورلنمه‌سی بو داواخانالاردا ایشله‌ین یوزلرله وطنداشین ایشسیز قالماسینا سبب اولوب. ایران‌وایرین قایناقلاری بو وطنداشلارین باشقا املاکلارینا دا ال قویولدوغونو بیلدیریر.
