ایران‌وایره چاتان خبره گؤره، اوین حبس‌خاناسیندا حبسده اولان مرتضی پروین جدا، باقر حاجی زاده، آیاز سیف خواه و کمال نوری آدلی دؤرد تورک مدنی فعالین محکمه‌سی ۱۳ تیر ۱۴۰۳-ده تهران اینقیلاب محکمه‌‌سی‌نین ۱۵-جی شؤبه‌سینه کئچیریلیب و بو فعاللار ساوونمالارینی تقدیم ائدیبلر.
بو محکمه اتوروموندا حاکم صلواتی بو فعاللارا قارشی تحقیرآمیز بیر توندا دانیشیب و حبسده اولدوقلاری زامان گوونلیک گوجلری طرفیندن ایشگنجه‌لره معروض قالدیقلارینی دئین فعاللارا جاواب اولاراق دئییب: دیندیرمه‌ده امکداشلیق ائدیردینیز کی، ایشگنجه گؤرمه‌یه‌سینیز.
۱۶، ۱۷ و ۱۸ بهمن-ده آیدا صدیقی خراسانلو، فاطمه آتشی خیاوی، کرامت روحنواز، علیرضا شیرزاد کوچنقی، امیرعلی برادران، یاشار حسین زاده، لطفعلی جباری، سهیلا اصغری، مرتضی پروین جدا، ودود اسدی، سالار طاهر افشار، سعید جمال زاده، باقر حاجی زاده، آیاز سیف خواه، سعید مینایی، کمال نوری، آراز امان، طاهر نقوی، سعید دوستان، سلیمان «آیدین» محمدی، کرم مردانه مستعلی بیگلو و عبدالله واحدی، اردبیل، خیاو «مشگین شهر»، رشت، اورمیه، تبریز، اسلامشهر تهران، کرج و آستارا، شهرلرینده، اطلاعات گوجلری طرفیندن حبس ائدیلیب.
بو واختا کیمی، بو فعاللاردان بعضیلری محکمه سورجی‌نین سونونا قدر مووقتی اولاراق اوین حبس‌خاناسیندان گیروو قارشیلیغیندا سربست بوراخیلیبلار.
