سولدوز و ماراغا شهرلرینده تورک مدنی فعاللار دونن، ۲ اسفند ۱۴۰۳-ده الوسلارآراسی آنا دیلی گونو موناسیبتیله اساساً آذربایجان تورکجه‌سی‌نین تدریسی و تورک ادبيّاتی ایله باغلی کیتابلار پایلاییبلار.
سون گونلرده اورمیه، تبریز، اردبیل، خییاو و دیگر شهرلرده ده آذربایجانلی فعاللار یوزلرله تورکجه کیتاب پایلایاراق، آنا دیلینده ائیتیمین اؤنمینی وورغولاییب و والیدئینلری بو مسئله‌‌یه داها چوخ دقت یئتیرمه‌یه چاغیریبلار.
ایران‌دا تورکلر اؤز آنا دیلینده ائیتیم آلماق، قزئت و تلویزیون کاناللارینا صاحب اولماق کیمی اساس حوقوقلاردان محرومدور. حتی آذربایجانلی والیدئینلر اؤولادلارینا تورک آدلاری قویماق حوقوقونا بئله مالیک دئییللر. بیر چوخ حاللاردا ایرانین وطنداشلیق قئیدیاتی ایداره‌سی یالنیز رسمی لیستده اولان آدلاری قبول ائدیر. والیدئینلر بو محدودیته قارشی چیخاندا، کیملیک وئریلمه‌سی آیلارلا گئجیکدیریلیر.
اولوسلارآراسی آنا دیلی گونونده سیویل توپلوم فعاللاری‌نین تورکجه کیتابلار پایلاماسی آنا دیلی‌نین قورونوب یاشادیلماسی اوچون کیچیک، آنجاق اؤنملی آددیملاردان بیری حساب ائدیلیر.
آیریجا هر ایل مهر آیینین بیرینده ائیتیم ایلینین باشیندا آذربایجانلی مدنی فعاللار آذربایجان ملتی‌نین چئشیدلی طبقه‌‌‌لری ایله بیرلیکده تورکجه کیتابلار یایماقلا، گرافیتی چکمک و دیوار یازماق ایله آنا دیلینده ائیتیمین اولماماسینا اعتراضلارینی بیلدیریرلر.
